Cyfieithydd

Disgrifiad o'r Cwmni

Dyddiad Cau: 11/11/2026

Mae Conwy wedi ymrwymo i ddiogelu. Caiff cymwysterau a geirdaon eu gwirio.

Sgiliau Iaith Gymraeg: mae’r gallu i gyfathrebu yn Gymraeg yn hanfodol ar gyfer y swydd hon. Rydym yn croesawu ceisiadau yn Gymraeg a Saesneg, ac ni fydd ffurflenni cais a dderbynnir yn y naill iaith neu’r llall yn cael eu trin yn llai ffafriol na’i gilydd.

Am drafodaeth anffurfiol am y rôl, cysylltwch â Nia Llwyd, Rheolwr Gwasanaeth y Gymraeg a Chyfieithu, ar 01492 576079 neu [email protected].

Am y rôl

Darparu gwasanaeth a fydd yn galluogi’r Cyngor i weithredu’r egwyddor na fydd yn trin y Gymraeg yn llai ffafriol na’r Saesneg, yn unol â gofynion Mesur y Gymraeg 2011, Safonau’r Gymraeg a Pholisi Cymraeg Mewnol y Cyngor.

Dan gyfarwyddyd Rheolwr Gwasanaeth y Gymraeg a Chyfieithu, byddwch yn ymgymryd â holl agweddau’r gwasanaeth cyfieithu, sy’n cynnwys gwaith cyfieithu ysgrifenedig yn bennaf. Byddwch hefyd yn darparu cymorth ac arweiniad i staff ar y polisi dwyieithrwydd ac arfer da, yn unol â Safonau’r Gymraeg a Pholisi Cymraeg Mewnol y Cyngor.

Prif Ddyletswyddau

• Cyfieithu papurau cyfarfodydd y Cyngor, y Cabinet, pwyllgorau, a grwpiau penodedig eraill, gan gynnwys adroddiadau, cofnodion a rhaglenni cyfarfodydd
• Cyfieithu dogfennau amrywiol eraill; er enghraifft: polisïau, cynlluniau lleol, ffurflenni, llythyrau, hysbysebion, gwybodaeth recriwtio, cylchlythyrau, rhybuddion, dogfennau cyfreithiol o bob math, arwyddion, newyddlenni a thaflenni
• Gall y swydd gynnwys cyfieithu ar y pryd mewn cyfarfodydd os byddwch chi’n dymuno. Ond nid yw’r gallu na’r gofyn am gyfieithu ar y pryd yn hanfodol ar gyfer y swydd hon
• Cynnig cymorth a chyngor parod i bob adran o’r Cyngor ynglŷn â materion mewn perthynas â Safonau’r Gymraeg a Pholisi Cymraeg Mewnol y Cyngor, a materion yn ymwneud â chyfieithu
• Darparu gwasanaeth darllen proflenni, golygu a gwirio testunau Cymraeg a gynhyrchir gan staff eraill, a chynnig cyngor iddynt ar y darnau unigol
• Cymryd rhan mewn cyfarfodydd a thrafodaethau tîm a chyfrannu’n bositif tuag at ddatblygu’r gwasanaeth cyfieithu a’r gwasanaethau iaith yn gyffredinol

Manylion am yr Unigolyn — Hanfodol

• Addysg hyd at lefel gradd neu gyfwerth
• Cymhwyster Lefel A/Safon Uwch mewn Cymraeg
• Gwybodaeth arbenigol o Gymraeg a Saesneg er mwyn cyfieithu’n fanwl gywir o’r naill iaith i’r llall
• Dewis yr union arddull a geirfa i gyfleu’r ddogfen wreiddiol wrth ei chyfieithu
• Cynghori aelodau eraill o staff y Cyngor ynglŷn â’r defnydd o dermau ac iaith
• Gallu defnyddio TG a meddalwedd Microsoft Office
• Gallu teipio’n gyflym ac yn gywir
• Gallu gweithio ar eich pen eich hun ac fel aelod o dîm
• Gallu gweithio dan bwysau cyson
• Gallu cadw cyfrinachedd
• Mae gallu cyfathrebu yn Gymraeg ar lefel 5 yn hanfodol
• Mae gallu cyfathrebu yn Saesneg yn hanfodol
• Rheoli eich llwyth gwaith i gwblhau dogfennau i fodloni terfynau amser
• Gallu ymdopi â phwysau gwaith sylweddol a chynhyrchu cyfran sylweddol o waith o fewn terfynau amser tynn
• Sgiliau rhyngbersonol da i gydweithio gyda staff, cyfieithwyr eraill, Cynghorwyr a’r cyhoedd

Dymunol

• Aelodaeth o sefydliad/cymdeithas cyfieithwyr cydnabyddedig
• Profiad o ddefnyddio cof cyfieithu
• Gallu cyfieithu ar y pryd (nid oes rhaid i’r ymgeisydd llwyddiannus ymgymryd â chyfieithu ar y pryd oni bai ei fod/bod yn dymuno gwneud hynny)
• Gwybodaeth am y Cyngor, ei drefnau a’r gwahanol adrannau
• Profiad o ddefnyddio offer cyfieithu sefydlog a symudol